ایران‌دا سلطنت‌چیلرین باشچیسی ساییلان محممدرضا شاهین اوغلو رضا پهلوی هر ایل اولدوغو کیمی بو ایل ده «۲۱ آذر»له باغلی چیخیشیندا گونئی آذربایجان میللی حکومتی نین سقوطونو ایرانین نجاتی و میللی بیرلیک گونو کیمی قئید ائد‌رک اوردونون یاردیمی نین بو بیرلییه چاتماق اوچون ان قیسا یول اودوغونو بیلدیریب.

ایران‌دا باش وئره‌ن اعداملار، قتللر و شوو-محکمه‌لرین کئچیریلمه‌سینه اعتراض ائد‌ن آدامین ۱۹۴۶-جی ایل گونئی آذربایجان‌دا بیر نئچه گونون ایچین‌ده مینلرله اینسانین کوتلوی حبس و قتلینی "میللی بیرلیک" – «آذربایجانین، ایرانین نجاتی» آدلان‌دیرماسی تعجب دوغورور.
آذربایجان دئموکرات فیرقه‌سینه موخالیف اولان ویجدان‌لی اینسانلار بئله ۱۹۴۶-جی ایلده اؤلدورولن مینلرله اینسانین اؤلوموندن ناراحات اولدوغونو دیله گتیریر. آنجاق بو فاجعه‌لری تؤره‌دنین اؤولادی رضا پهلوی نین عذر ایسته‌مک یئرینه، قتل عامی «میللی بیرلیک و بایرام» کیمی قئید ائتمه‌سی ایرانین گله جه یی نین نه قدر آجیناجاقلی دورومدا اولاجاغیندان خبر وئریر.

سلطنت‌چی و مرکزچیلرین حاکمیته صاحبله‌نمه‌دن بو جور عدالت‌سیز ادعالاردا اولماسین‌دان آچیق-آیدین گؤرونور کی، ایرانین گله‌جکده پارچالانماق‌دان باشقا یولو اولمایاجاق.