کولت. آذ ملا نصرالدین لطیفه‌لری سیلسیله‌سین‌دن نؤوبتی حکایه‌نی تقدیم ائدیر:

تیمورلنگه خبر وئریرلر کی، ملا نصرالدین بیر مجلیس‌ده اونون ظولمکارلیغین‌دان دانیشیرمیش. تیمور حیرصلنیب ملانی حضورونا چاغیریر کی:

-بو ندیر؟ یوخسا باشین بد‌نینه آغیرلیق ائلییر؟ دئییرلر مجلیسلرده منیم ظولمکارلیغیم‌دان دانیشیرسان.

-قیبله‌یی عالم ساغ اولسون! سن اؤزون بیلیرسن کی، من همیشه ائله سؤز دئییرم کی، غریبه اولسون، تزه اولسون، هئچ کسین ائشیتمدیی، بیلمدیی، دانیشمادیغی اولسون. خوروز سسی ائشیتممیش اولسون. سنین ظولمکارلیغین هامینین بیلدیی، دانیشدیغی کهنه شئی‌دیر. بورادا نه غریبه‌لیک وار کی، من ده دانیشام؟ سنه یالان دئییبلر.