کولت. آذ گونئیلی یازار ایبراهیم رشیدینین «عیسی نین سون شامی» حاقیندا یازیسینی تقدیم ائدیر:

«عیسی نین سون شامی» لئوناردو دا وینچینین اؤلمز تابلولاریندان بیریدیر.

او تابلونو گؤرموش اولسان
بیر صحنه‎دیر:

حواریلر مسیهانین
ساغ-سولوندا احتیراملا ایله شه‌رک
سون دفعه شام یئییرلر.

حواریلر جرگه‌سیندن
یهودا آدلی بیر سیرداش
خاین چیخیب،
مسیحانین گیزلی یئرین
لووا وئره‌جک.

حاق اوردوسو باسیلمیشدی.

شاعر کریم مشروطه‌چی (سؤنمز) خیالی اولاراق بو تابلونون یارادیلیش ناغیلینی شعیر مؤوضوعسو ائدیب، توپلوم و گوج صاحبلرینین اینسان تربییه‌سینه تأثیرینی بیان ائدیر. سؤنمزه گؤره، رسام بو تابلونو چکمک اوچون ایکی فرق‌لی مدله احتیاج دویور: بیری یاخشیلیق سیمگه‌سی مسیحانی، دیگری پیسلیک سیمگه‌سی اولان یهودانی گؤستره‌ن مدل.

او، مسیحانی تصویر ائده بیلن بئله بیر اینسان اوزو آختاریر.

باخیشین‌دان عصمت یاغسین،
گولوشوندن رحمت یاغسین،
یئریشیندن قان قایناییب،
دوروشوندان عزت یاغسین،
گؤرن دئسین «مسیحادیر».

رسام چوخ آختاریشدان سونرا بیر جاوانی اؤزونه نمونه سئچیر:

رسام اوندان ایلهام آلیر،
مسیحانین یاراشیغین،
گولر اوزون، معصوم گؤزون ترسیم ائدیر.

دا وینچی یهودا اوچون ده بئله بیر مدل آختاریر:

بیر مودئل کی، یهودانین
خاینلیین، یالتاقلیغین
یالانچیلیغین، آلچاقلیغین
تام سرعتده نیشان وئرسین.

بیر مدل کی، رسام گؤرجک
اوریین‌ده نیفرت دوغسون،
اوزده یولداش، دالدا دوشمن اولسون.

یولداشینین آغزین اؤپوب،
دالدان دؤنوب خنجر وورسون.

رسام بئله بیر آدام سورتو تاپماغا ۳۵ ایل، بلکه ده ۴۰ ایل واخت صرف ائدیر. نهایت، چوخ قورخونج بیر اینسانین صورتینده بو قورخونو حس ائدیر.

باخیشیندان ذلت یاغیر،
دوروشوندان نیکبت یاغیر،
شیطانلیغین تام هیکلی،
وارلیغیندان نیفرت یاغیر.
لاپ، ائله بیل یهودادیر!

دا وینچی اونو دیله توتوب دانیشدیریر. اصلینده، او دا بیر گون معصوم و مهریبان اینسان ایمیش، اما حاکم گوجلر و لاقید توپلومون آیریسئچکیلیگی اونو بئله بیر وحشییه چئویریب. دا وینچی اونو یهودا نمونه‌سی ائدیب کامیل ائدیر. اما آخیردا او قوجا دا وینچی بئله بیر سوال وئریر: «سنی تانری، ده گؤروم کی، سن او رسام دئییلسه‌نمی؟

اوتوز بئش ایل، بلکه، قیرخ ایل
بوندان اول
منی او گنج یاشلاریمدا
بیر سالوندا ایلشدیردین
کیمه، نیه مدل دوردوم، اونو بیلمم».

دا وینچینی حیرت گؤتورور. دئمک، بو آدام جاوانلیقدا عیسی نین، قوجالیقدا ایسه یهودانین مدلی اولوب.
...
جینایتین بو قدر چوخالماسینا جاوابده کیمدیر؟
ایبراهیم رشیدی