آنا صحیفه یازارلار |
چوخداندیر، چوخلاری کیمی، بیر خوش خبرین ائشیتمهسینه حسرت قالمیشام. تلگرام ایله اینستاگرامی آچدیغیمدا، اؤلوم خبریندن باشقا، بیر ده سون اولایلاردا جانلارینی الدن وئرمیش یازیق گنجلرین شکیللریندن باشقا، بیر زاد گؤره بیلمیرم.
بو آرادا، آراسیرا، گؤز آلتینا آلینمیش یولداشلارین دا آدلاری گؤزومه دییر، البته. اونلارین شکیللرینی گؤرمهیه گرک دویمورام. ائله آدلارینی گؤرجک، معصوم باخیشلی گؤزلری گؤزلریمین قاباغیندا دورور. بونلارین چوخلارینی یاخیندان تانیییرام. چوخلاری ایله دؤنهلرله، گؤروشوب، دانیشمیشام. هر بیری، تک باشینا، آغیر بیر وطن یوکونو چیینینده داشیان ایگیددیر.
بونلارین، قالسین باشقا اؤلکهلر، اؤلکهمیزین ایچینده بئله، هئچ بیر یئره باغلی اولمامالارینا اینانیرام. بونلار تک بیر زادا باغلی اولسالار، او دا وطن سئوگیسیدیر. وطن سئوگیسیندن باشقا بونلاری یؤنلندیرهجک هئچ بیر گوج دونیادا یوخدور.
بونلارین هئچ بیریسی آشیری ایشلره ال ووران دئییل. هئچ بیری، قالسین هله ملت اموالی، هئچ دؤولت اموالینا دا ضرر ووران دئییل. بو سؤزلری بونلاری بیرر بیرر تانیدیغیما گؤره، بوتون اینانجیملا دیله گتیره بیلرم. بونلارین باخیشیندا بانکلار، اوتوبوسلار، دوراقلار... شهرلریمیزده یاشایان اینسانلار اوچوندور. شهرلریمیزین آلتیاپیلارینی یاخیب، یاندیرماق سوچو بونلارا یاراشمایان بیر سوچدور.
دئدیییم کیمی بو اینسانلار هئچ زامان خشونتین پئشینده اولماییبلار. خشونتین قاباغینی آلماق ایستهییریکسه، اؤنجه گرک دؤولت طرفیندن یارانان خشونتین قاباغی آلینا. بونو قاباقجا دا دئمیشدیم، یئنه ده دئییرم. بو معصوم اینسانلاری بوندان آرتیق گؤزآلتیندا ساخلاماقلا، بونلارین اؤزگورلویونون قاباغینی آلماقلا خشونتی دایاندیرماق اولماز.
بئله بیر دورومدا، بو یازیلاری یازماغیمین ندنینی اؤزوم ده بیلمهییرم. بلکه ده اؤزومه توختاقلیق وئرمک اوچون یازیرام! بلکه ده اونلاری اونوتمامامیشام دئیه، یازیرام! آما کیمه، دئیه؟! بونلارین منیم بو یازیلاریمی گؤروب اوخویا بیلمهیهجکلرینی یاخشی بیلیرم. منیم بو یازیلاریمی، آنجاق بونلاری توتوقلایانلار اوخویارلار. اونلار دا هئچ واقت منیم بو سؤزلریمله رحمه گلمزلر...
تاریخ
2019.12.05 / 22:38
|
مولف
Axar.az
|