سایغی ده‌یر یولداشلار، نئچه گون سونرا آذربایجانین گوز ببه کلری اولان اورمو ایله سولدوزدا حساس بیر سئچکی یه شاهید اولاجاییق. گروهلاردا و سانال دونیادا چئشیدلی باخیشلار و یازیلار پایلاشیلیر. آنجاق اورتاق بیر نقطه وار: اودا وطنی مهاجرلره باغیشلاماماق!

سولدوزدان سئویندیریجی خبرلر گلمکده دیر و تورک وطنداشلاریمیز اورتاق بیر آدایا یئتیشمک اوزره دیرلر. البته اوشنویه نین رای تاثیری چوخ اولدوغو اوچون، بو ایش یئترلی دئییل و باشقا ایشلرده گورولمه لی دیر.
اورمودا کئچن دوره کیمی ایشلر چتینلشیب دیر. قاباقکی تجروبه لر گوستریب کی باشقا شهرلردن فیکیرداشلارین بیرلشدیرمه اوچون ال اوزاتمالاری یاخچی سونوجا وارماییب و بو دونه ده اوجوردور. اورمونون مساله سی اورادا چوزولمه لی دیر و تاسوفله فیکیرداشلاریمیز اورتاق بیر مکانیزمایا چاتا بیلمیرلر.
بو ایشین چوزومو آز قالان بو مودتده چوخ چتین دیر، آنجاق اولا بیلمز دئییل. منجه:
۱. هر چئوره اوبیری چئوره نی توپارلاییب، آشاغیلاماقدان ال چکمه لی دیر. محبت محبت گتیرر، اخلاقسیز داورانیش و ادبیاتلا بیرلشمک اولماز.
۲. کئچن سئچکیلر کیمی اوچ آدایین ایکیسینده (حضرت پور و ذاکر جنابلاری) اورتاق نظر وار. آنجاق فیکیر آیریلیغی اوچونجو آدایدادیر. اوچونجو آدایین بیری میلتچی عائیله سینه عایید و اوبیریسی میلتچی یه قارشی اولان چئوره لره عایید، بیرینین رای اورانی یوخاری و اوبیریسینین کی آزدیر. نه ائتمک اولار؟ منجه:
۱- ۲ نوروزی جنابلاریندان میلتیمیزین گله جه یینی نظره آلمالارینی ایسته ییب، اورتاق بیر آدای نفعینه قیراغا چکیلمه لرینی ایستییه بیلریک. بو ایش اورتاق آدایین بللی اولوب، بوتون چئوره و گروهلارین بیرلیک سوزوندن سونرا اولمالی دیر.
۲-۲ جلال زاده نین رای اورانی یوخاری اولسادا، کئچمیشی و چئوره سی بیزی دوشونمه یه چاغیریر. بیز کمونیست لرین "آماج آراجی توجیه ائدر" سیاستینه اویمامالیییق. بیزیم قیرمیزی چیزگی لریمیز اولمالی دیر. بونا باخاراق، باشقا بیر رای اورانی یوخاری اولان آدایی دوشونه بیله ریک.
بئله بیر فرد اولمازسا، ان آزی جلال زاده بیزیم ایستکلری آچیق شکیلده تایید ائدیب، کئچمیشی ایله ایرانشهری دوشونجه سینی قیناماغا مجبور ائدیلمه لی دیر. بو ایش اولاندان سونرا، اوندان حمایت اولونا بیلر.

عزیز یولداشلار:
اورمور سئچکی لرینین یاخچی سونوجا وارماغی، نوروزی جنابلارینین میلتیمیز اوغروندا اوز حاققیندان کئچیب، بیرلیک نفعینه قیراغا چکیلمه سینه و فیکیرداشلارین اورک بیرلیگینه باغلی دیر. بونو بیلمک لازیمدیرکی دوروم ایندیکی شکیلده قالسا، کئچن دوورده کی حماسه یارانا بیلمز. نییه کی اوست - اوسته سئچکیلره قاتیلیم آزدیر و قاضی پور کیمی کاریزمالی و رای اورانی چوخ یوکسک اولان فردیمیز یوخدور تا میلتیمیزی هیجانا گتیرسین. بوندان علاوه، ان آزی ۲۰% رای گتیرن مجلیسه گئدیر، بیر حالداکی کئچ سئچکیلرده ۲۵% گرکیردی و ایکینجی دووره قالما ایمکانی چوخ آزدیر.
ایندیکی دوروم اورتا دوغودا "مهار قومی" و "ایکینجی اسرائیل" سیاستلرینین سونوجودور. تانری میلتیمیزی بو بلالردن قوروسون.
وطن اوغروندا بیرلیک و دوشونجه گرکیر و اصیل میلتچی بو ایشین اونونده گئدر.