وئرمیشم سعادتی، آلمیشام فلاکتی من

بوتون جاهان ایله، دییشمم بوحالتی من

همیشه لای‌لالاریندان، یادیمدادیر آنامین

کی ساتمارام قیزیلا، خالق ایله، شرافتی من

اینسانلار دیله یالنیز بیر باغلانتی وسیله‌سی کیمی یوخ، بلکه اؤزلرینه وارلیق باغیشلایان و کیملیک وئرن بیر گرچک کیمی یاناشیرلار.
دیل اینسانلارین یاشامینا جان باغیشلایان بیر تمل اولدوغو دانیلماز بیر گرچک‌دیر.

اینسان دونیایا گؤز آچدیقدا آناسی‌نین لای‌لاسینا نازلانیر ، آناسی‌نین دویغولو، حزین اوخشامالاری‌لا بویا-باشا چاتیر. آنا سئوگیسی ایلک سئوگی اولدوقدا، آنا دیلی واسیطه‌سی ایله اینسانا چاتیر .

دیل تکجه دانیشیق آراجی دئییل، دیلین ایچینده چوخلو گرچک‌لر وار، بو گرچک‌لر اینکیشاف اولا بیلر. آنجاق بیر دیلی محو ائله‌مک او دیلده دانیشان اولوسون، ایلایین (تاریخین)، کئچمیشین، ادبیاتین، مدنییتین، هونرین، کیملیین، وارلیغین...محو ائله‌مکدی، بو ایسه بؤیوک بیر جنایتدی.
... ایندیکی دونیالیق دوروموندا اوخوموش یاخود ساوادلی اونا دئییلر ، بیر سیرا دوغالسال بیلگی‌لر ، ریاضی‌نین دؤرد آنا ایشله‌میندن آرتیق، اؤز آنا دیلی‌نین ادبی فورماسینی دا اؤیرنمیش اولسون...

آمما دونیانین هئچ بیر اؤلکه‌سینده چوخلوقدا اولدوقجا اؤز آنا دیلینده حتتا ایلکین حددینده اوخویوب یازما حاقلاریندان محروم قالان بیر میللت تاپماق اولماز. بئله بیر غیری اینسانی شرایطی اؤلکه‌یه حاکیم ائدن پهلوی رئژیمیی‌نین کؤلگه‌سی تأسف‌لر اولسون هله ده بو اؤلکه‌نین فضاسینا آغیرلیق ائدیر.

هر بیر تورک بیلمه‌لیدیر، آنا دیلیمیزی یارالییان خنجر و سونگولرین ان آجیسی، ان زهرلیسی کئچمیشده و ایندیکی چاغدا یابانجی دیلده اوخول وتحصیل آلماقدیر...

دونیا عالیم‌لری بئله دئییرلر : "آنا دیلیمیزه اؤنم وئرمه‌سک و یییه چیخماساق، اولا بیلر بیر گون دیلیمیز ایتر باتار ، یوخ اولار ، بیر میللتین ده دیلی باتدی او میللت ده باتار چونکو بیر میللتین وارلیغی ،کیملییی ... اونون دیلینده دیر".

... آنجاق آنا دیلیمیزی منیمسه‌ییب، قورویوب گؤزل قونوشوب و یایماق اوچون اؤنجه اؤیره‌نیب سونرا اؤیرتمه‌میز کولتورل بورجوموزدور. هر کس بیر تورک اولاراق بو بورجو اؤده‌مه‌لیدیر.