الینده کی کیتابی اوخورکن بیر آن دوشونمه یه باشلادی. حیاتینین یاریسینی وطنی اوچون یاشامیشدی. اون بئش ایل اولاردی وطن ایله یوخودان دورار وطن ایله ایشه گئدر و وطن ایله یاتاردی. وطن اونون حیاتی ایدی. وطنی نین اؤزگورلوگو ساواشدیغینی دوشونوردو. آما سون دؤنملرده اولایلار اونون وطن انلاییشینی یئنیدن دوشونمه سینه ندن اولموشدو.

وطن ساده جه کئچمیش ایله اولارمی ؟ وطن ساده جه تاریخدن عبارت می دیر؟

وطن ساده جه قهرمانلارین اولدوغو و اونلارا سیغیناراق آزادلیغی آرزولاماق ایله می گئرچکلشر؟ و مینلرجه گونوموزده وطنلرین یئنیدن نئجه قورولدوقلارینی اؤز اؤزونه سوروشوردو.

وطن آنلاییشی بیر تک دویغودان عیبارت دئییل. وطن صاحیبی اولماق و اونو یاراتماق اوچون اؤنجلیکله آیدین بیر اینسان اولماق گره کیر. چونکو او زامان دوغرو و یاشانابیلن بیر وطن یارادابیلرسن. نه یازیق یاشادیغیمیز توپلوم سیاسی حاکمیتین باسقیسی سونوجوندا توپلومسال آنلاییشدان یوخسونلاشیبدیر. بیزیم اؤنجه لیکله بو توپلومسال بیلینجیمیزی یاراتمامیز گره کیر. توپلومسال بیلینج اولمادان وطن آزادلیغی اوغروندا مبارزه قارانلیقدا یئریمک کیمیدیر. توپلومسال بیلینج و یا آیدینلانماق ایسه دوشونمکدن و سورغولاماقدان کئچر. بیز گونوموز توپلوملارین یاراتدیقلاری مدرن ده یرلری منیمسه مه لییک. اونلاری گؤروب اؤز توپلوموموزو یاراتمالییق. توپلوم ساده جه فوتبال استادیوملاریندا و سئچکی تبلیغاتیندا یارانماز. یاشاسین آزربایجان دئمک ایله آزربایجان یاشاماز. بلکه او هر گون اؤلر و بیز بونو بیلمه ریک.