قاراقویونلولارین بؤلگه‌سی جهانشاه زامانیندا، آذربایجان، ایندیکی تورکیه‌ و عراق‌ین بعضی قسمتلرینه شامل اولور، خلیج فارسا کیمی اوزانیردی. بیر یاندان دا خزر دنیزی‌نین باتی ساحیلی و گیلانین بؤیوک حیصه‌سینی ایچریردی. یقینا بو بؤلگه‌لرده او دؤوردن قالان آراشدیرماغا و قوروماغا ده‌یر بیر چوخ تاریخی اثرلر و ایزلر قالمیشدیر.

عینی زاماندا آق‌قویونلولار، قاراقویونلولار بؤلگه‌لرنین باتیسیندا، ایندیکی تورکیه‌نین دیاربکر منطقه‌سینده کیچیک قلمرولاری واریدی. ۱۴۵۳ میلادی‌ده عثمانلی‌لار بیزانسی قسطنطنیه‌ده یئندیلر. ۱۴۶۷ ده، اوزون حسن قاراقوونلولارا ظفر قیلدیقدان سونرا حکومتینین سینیرلارینی گئنیشلتمک ایسته‌دی. اونون حکومتی تورکیه‌نین بعضیی بؤلگه‌لری، پاکستان، ایران (خوراساندان سووای)، بوتون عراق-‌ی ایچریردی.

اوزون حسنین خانیمی تئودورا، ترابوزان امپراتورونون قیزی ایدی. اونا دئسپینا خاتون دئیردیلر. دئسپینا خاتون ایللرجه تبریزده ملکه ایدی اما مسلمان اولمادی. دئسپینانین قیزی‌نین آدی مارتا (حلیمه) ایدی. مارتا صفوی خاندانی ایله وصلت ائدندن سونرا، بیر اوغول صاحبی اولدو. بو اوغلان صفوی حکومتی‌نین قوروجوسو اولدو؛ بیرینجی شاه اسماعیل.

اوزون حسن و دئسپینا زامانیندا آق قویونلولارلا ونیز جمهوروسو آراسیندا دیپلماتیک و تیجاری ایلشکیلر قورولموشدو. ایرانا گلن ایتالیالی تاجرلر و دیپلماتلار تبریز درباریندا دئسپینا خاتونلا گؤروشلر آپارامیشلار( تقریبا ۵۵۰ ایل اؤنجه). تاریخی قایناقلارا گؤره دئسپینا درباردا قدرتلی بیر قادین‌ایمیش.

تئودورا مئگاله کومننه یا تئودورا کومنن (یونانلیجا: Θεοδώρα Μεγάλη Κομνηνή)
ایرانین تاریخی قایناقلاریندا دسپینا خاتون یا دئسپینا کاترینا آدییلا تانینان، تئودورا مگاله کومننه یا تئودورا کومنن، ترابوزان-ین سون امپراتورو، دؤردونجو ژان-ین قیزی‌ایدی. او، صفوی خاندانی‌نین قوروجوسو اولان شاه اسماعیل‌ین جدّی، آق‌قویونلو سولطانی، اوزون حسن ایله ائولندی. بو ائولنمه، اوزون حسن ایله اورتودوکس مسیحی‌لرین ایلیشگیلرینی گوجلندیردی. بو ائولیلیگین شرطلریندن، دئسپینانین اؤز دینی یعنی کریستیانلیقدا قالماسی ایدی کی، اوزون حسن بو شرطی قبول ائله‌دی.

دئسپینا اولدوقجا گؤزل ایدی. اونون گؤزل‌لیگی بوتون یونانلی قیزلارین دیل ازبری ایدی. دئسپینا بیر گروپ کریستیان روحانی‌لرله ایرانا گلیب، اوزون حسن‌ین اذنی ایله ایراندا کیلسه قوردو. سونرالار دئسپینا، مارتا (حلیمه) آدیندا بیر قیز دونیایا گتیردی. مارتا، یا همان حلیمه، شاه اسماعیل صفوی‌نین آناسی اولدو.
اوزون حسن‌ین، دئسپینا خاتون‌دان بیر اوغلو و اوچ قیزی اولدو. او، ‌گؤزقاماشدیرییجی گوزللیگیندن دولایی، ها بئله عثمانلی‌لارین اصلی رقیبی‌نین خانیمی اولدوغونا گؤره اورتاچاغ اوروپاسیندا افسانوی بیر اون و شهرته مالک اولدو.
اوزون حسن اؤز ضدعثمانلی اتحادینی بو ائولیلیکله گوجلندیریب، یونانلیلار، ائرمنیلر و گورجولرین دسته‌یینی قازاندی.

دئسپینانین ائولیلکدن اؤنجه‌کی یاشامی حاققیندا الده اولان بیلگیلر محدوددور. دئییلن‌لره گؤره، آنادان اولاندا آدینی کاترین قویموشلار. او، ترابوزان شاهزاده‌سی دؤردونجو ژان-ین تورک سویلو ایکینجی خانیمیسیندان اولان قیزی ایدی (محتملا ۱۴۳۸ایلینده یا دا اونادان اؤنجه ائولنمیشدیلر). بعضی متن‌لرده ایسه،‌اونو دؤردونجو ژان-ین قارداشی دئیوید-ین قیزی یازیبلار. حتی بعضی متن‌لرده اونو دؤردونجو ژان‌ین ایکینجی خانیمیسیندان اولان نامشروع اوشاق کیمی تانیتدیریبلار.