آنا صحیفه یازارلار |
کولت. آذ گونئیلی یازار محمود دوستانین آنا دیلی ایله باغلی یازیسینی تقدیم ائدیر:
ایراندا مکتبلر آچیلدی، اما گونئی آذربایجان شهرلرینده میلیونلارلا آذربایجانلی اوشاق اؤز آنا دیلینده دئییل، مجبوری شکیلده فارس دیلینده تحصیل آلیر.
بو اؤلکهده چوخلو آذربایجانلی یاشاسا دا، حاکمیت فارسلارین الیندهدیر. دؤولتین اساس ایداره ائدیجی اورقانلاریندا اؤز آداملارینی و یاخود بیزلردن اولان، لاکین کیملیکلرینی ساتمیش اینسانلاری یئرلشدیریرلر. بو سببدن سیاستلرینی چوخ آسانلیقلا غیری-فارس میللتلره یئریده بیلیرلر.
وظیفهده تورک کیملیینی سئومهیهن اینسانلار اولدوقدا تورکلرین حاقلاری اونلار طرفیندن تاپدالانیر. بو سیاست پهلوی دؤوروندن قالان پانفارسلارین ایدئیاسی ایله بیزیم دیل، تاریخ، مدنیت و کیملییمیزی آرادان قالدیرماق مقصدیله ایرلی سورولوب. اوشاقلاریمیزی آسیمیلیاسییا ائتمکله، گنجلریمیزین اؤز آنا دیللریندن و کیملییندن اوزاقلاشیب، فارس دیلینده یازی-پوزو اؤیرنمهیی سئویب، اونا ماراق گؤسترمهسینه باعث اولورلار.
ایران کونستیتوسییاسینا اساساً ایراندا یاشایان هر بیر خالق فارس دیلی ایله یاناشی، اؤز آنا دیلینده ده تحصیل آلا بیلر. لاکین بو حاقی بیزلردن آلیبلار. اؤزلرینین قویدوغو قانونا اؤزلری بئله عمل ائتمیر.
بیر میللتی آرادان آپارماق اوچون ایلک اؤنجه میللتین دیلینی، تاریخینی و تاریخی شخصیتلرینی اونوتدورورلار. و سوندا او میللتی آسانلیقلا آسیمیلیاسییا ائدیب آرادان قالدیریرلار. بیزی آسیمیلیاسییا ائده بیلمهمهلری اوچون آنا دیلیمیزی قوروماق باشلیجا شرطدیر. بو حساس دورومدا آذربایجان دوشمنلری، اؤزللیکله پانفارسلار بیر-بیری ایله ال-اله وئرهرک، تورکلرین تاریخ، مدنیت و دیلینی محو ائدیب، آرادان قالدیرماق ایستییرلر.
ایراندا غیری-فارس خالقلارا مکتبلرده اؤز دیللرینده تحصیل آلماق ایمکانی وئریلمیرسه، ائویمیزده اوشاقلاریمیزی آنا دیلیمیزده دانیشماغا تشویق ائتمهلییک. گونئی آذربایجاندا یازارلار، شاعرلر، تاریخچیلر و مدنی فعاللار هر زامان بو بیرطرفلی سیاسته اعتراض ائدیبلر. سوسیال مئدیادا دا اعتراضلار اولور، موختلیف کامپانییالار قورولور، اوشاق کیتابلاری آلینیب مکتبلره پایلانیلیر.
بیز آنا دیلی ایله باغلی آمالیمیزدان گئری دؤنمسک، حاقیمیز اولانی آلا بیلریک.
تاریخ
2019.09.24 / 18:12
|
مولف
آیتاج آراز
|