آنا صحیفه یازارلار |
اوشاق ایکن سئودیییم اویونلاردان بیریسی گیزلن قاچ اویونو ایدی. بیریسیندن گیزلنمک اوچون اؤزوموزو ائله یئرلرده گیزلهدیردیک نه قدر آختارسا بئله، بیزی تاپابیلمهسین. بو اویوندا سئوینج اؤزللیکله اوتقو سئوینجی، ایلنجه و ذوق آلماق تاپیلماق قورخوسوندان قات-قات ایری ایدی و اونو اوستهلهییردی.
یالان -گرچک بئله بیر سؤیلنتی واردی، بیریسی گیزلن قاچ اویونوندا ائله گیزلهنیب هله ده کی هلهدیر تاپیلماییب و بلکه ده اؤلهنه دک بیله تاپیلمادی...
اصلینده گیزلنمهلر بیزیمله دوغور، اینسانلار هانسیسا دویقو، ایستک و دوشونجهلرینی عاییله و توپلومون گلهنک و نورملاری اساسیندا و ائتیکا قوراللارینا دایاناراق گیزلهمک مجبوریتینده قالیرلار. سؤز قونوسو مستبد حاکیمیت چرچیوهسینه گلدیکده ایسه ان اؤنملی گیزلنمهلر او خسته و یاراماز قورولوشون اینسانلاریندان اولور.
اینسانلار بؤیویوب بیرآز چئورهنی تانیدیقجا گیزلنمهلرینین جیزیقلاری دا بؤیویور و گئنیشلهنیر.
نه قدر سیاسی سیستملر توتالیتر قورولوشا یاخین اولسالار بیر او قدر قورخو و اؤلوم قوخوسو توپلومون عینیلشمیش و ذرهلهشن آداملاری آراسیندا یایقین اولور و اینسانلار ائله بیر دوروما گلیب چیخیرلار بیر-بیرلرینین کؤلگهلریندن بیله قورخورلار و هامی قاپالی صاندیقلار کیمی گؤرونمهیه باشلاییرلار. یاشامین ان نورمال مسالهسی بیله اینسانلار طرفیندن گیزلهدیلیر.
هامی تئاترو صحنهسینده کی اینسانلار کیمی اویون اویناییرلار و بو اوینامالار یالنیز قورخو اوزوندن اولور، اینسانلار قورخورلار دئیه، گرچک منلیک و اردملرینی گیزلهدیرلر.
هامی ایچ دونیاسینا چکیلیب، قیسیلیر، قورخولار اوزوندن اولان چکیلمهلر و گیزلنمهلر دیش دونیالاری کیچیلدیب ایچ دونیالاری بؤیودور. بو سورج سوردوکجه دیش دونیالارین پایی اینسانلارین یاشامیندا داهادا کیچیلیب و آرادان گئتمهیه مجبور قالیر. هردن بو ایچینه چکیلمه و ایچری دونیایا قاپانما، اینسانلارین بیر بالاجا گیزلین و دالدالیق اوتاغا سیغینیب بوزوشن بتیمینه بنزهییر.
توپلومسال یاشامدا اولان گیزلنمهلر چوخالدیقجا اینسانلارین ذهنیتلرینی داها دا بالاجالاشدیریر، سؤزلر کیچیلیر و سؤزجوکلر داغارجیغی آزالیر و بونونلا دا دوشونجه بویوتلاری قیسالیرلار.
قالین-قالین کیتابلارین مینلرجه اولان سؤزجوکلرینی، شعرده کی بیر نئچه سؤزجوکلرین ایچینده سیغیشدیریب سینیرلاندیریلدیغی کیمی.
سؤزلر، آنلاملار و قاوراملار آزالدیقجا اینسانین ذهنی بوشالماغا دوغرو یورویور، بو بوشلوقلارین دولماسییلا و گیزلنمهلرین اؤلچوسو چوخالماقلا، اینسانلار یالقیزلاشیرلار. توپلوم یالقیزلاشمیش بیر اینسان ییغینینا دؤنوشور. آتومیلشمیش ییغیندا اولومسوز بیرئیسللیک گؤزه چارپیر. بئلهلیکله ده ایمپاتیالار توپلومون آراسیندان گؤتورولور.
اوزون یاشام سورهلری یالنیز یاشانیلان آنلارین ایچینده یئرلهشیر و زامان کئچمیشلردن و گلهجکدن قوپوب یالنیز ایندیلییین لاپ ایندیسینده آنلاملانیر.
بئله بیر توپلومدا بیلیش یالنیز هر بیر اینسانین ان سون تجربهسیندن عبارت دیر و یارین او تجربه ده اونودولور، اینسانلار اؤز تجربهلرینی بیله توپلاییب بیرآز ایری و گئنیش بیلیشه وارمیرلار.
گوندهلیک یاشام بوشلوقدان دولور و یالنیز ان یاخین خاطیره، یاشامین دادی-دوزونا چئوریلیر. آنجاق او دا زامان گئدیشینده اونودولور.
یالان دانیشماق، اویون اویناماق و گیزلنمهلر هامینی کاراکتر اؤزللیگینه دؤنور. بعضا گیزلنمهلر یوخولارا و ان بالاجا خیاللارا بئله ال-قولونو اوزادیر.
اینسانلارین چوخونلوغو گوونلی یاشاماغا وارماق اوچون بیر- بیرلریندن اوزاقلاشیب گوج داییرهلرینه یاخینلاشیرلار و دئدی-قودو توتالقاسینا چئوریلهرک بعضا عاییله اویهلرینی بیله حاکیمیته ساتیرلار، ساتقینلیق ایسه ان یایقین خستهلیگه دؤنوشور....
اوسته گل،گؤوه نینی قوروماغا جان آتان بوش وارلیقلار هردن اؤزلری ده دانیشدیقلاری بؤیوک یالانلارا بیله اینانیب اونو دوغرو سانیرلار.
بئله اولان بیر دورومدا گرچک کاراکترله سانال کاراکترین آرالیغی بؤیویور و آردیندا گرچک کاراکترلر سانال کاراکترلرین آیاغی آلتیندا ازیلیب یوخ اولماغا ساری گئدیرلر.
گیزلنمهلر چوخالدیقجا هر شئی یوخلوغا دوغرو گئدیر، یاشایان اینسانلارین وارلیغی بیله یوخ اولماق، اونودولماق دوغرولتوسوندا آتدیملاییر، لاپ اوشاقلیقداکی او سؤیلنتی کیمی گیزلنمکدن تاپیلمایان او کیمسهلر کیمی...
تاریخ
2020.04.03 / 20:25
|
مولف
Axar.az
|